Kati Patang

Bahut der huyi zindagi ke bandhan nibhate huye..
Ab har dor tod ke aage badh jane ko jee chahta hai..
Ek kati patang ki tarah khule aasman mein..

Bina kisi bandish ke der tak lehrane ko jee chahta hai...

Na koi manzil ho na humsafar..
Ek anjaani dagar par akele nikal jane ko jee chahta hai..

Subah ho toh suraj se damak jaun..
Raat ho toh chandani se chamak jaun..
Baarish ki boondon mein bheegne ka..Badlon ki chadar odhne ka..
Aur taaron ki beech jhoom jane ka jee chahta hai..

Na koi roke mujhe..na koi toke mujhe..
Bas apni aayi kar jane ka jee chahta hai..
Kehne ko koi apna ho ya na ho..
Par pura amber mera ho..kuch aisa ho jaye..yeh jee chahta hai..

Wapis toh phir zameen par hi aana hai..
Kisi dali ya taar mein ulajh kar reh jana hai...
Par kuch pal ke liye hi sahi..
Kash aisa jadu sa ho jaye..jisme kho jane ko jee chahta hai...

Bahut der huyi zindagi ke bandhan nibhate huye..
Ab har dor tod ke aage badh jane ko jee chahta hai..
Ek kati patang ki tarah khule aasman mein..
Bina kisi bandish ke der tak lehrane ko jee chahta hai...